Demedhyans Diwyethek!An 26ves mis Genver, demedhyans ekumenek ha diwyethek a veu solempnys yn Chapel Methodyst Ponselen ogas dhe Borthtreth, a skrif Rev’d Jane Kneebone. Paul Holmes ha Jean Pollock yw eseli an Keur Tereba Nessa a gan yn Kernewek, hag i a vynna gul aga tiow yn Kernewek. I a’m pysas avel chaplen an keur a gemeres rann y’aga demedhyans, ha gwiw yth heveli dhedha bos demedhys y’n chapel may hwra an keur omassaya ena. Ytho, tybyans a dhemedhyans ekumenek ha diwyethek a veu genys. My a dreylyas an servis demedhyans Methodyst dhe Gernewek, hag ena Rev Amanda Stevens, menyster an trogelgh Rysrudh, ha my, a restrys py rannow an servis a via ledys yn Kernewek ha py rannow yn Sowsnek – wos’tiwedh y teuth ha bos demedhyans Methodyst gans awedhyans anglikanek! An servis a brovas bos hwarvos marthys, lowen ha kowethek. Paul a wiskas an vrithenn gernewek ha Jean brithenn hy hendasow Albanek. An venyn bries a veu pibys yn-nans an gasel gans piber Kernewek (an Is-bardh Meur yn hwir). Avel ilewydh i re ynkorforsa meur a gana, komprehendys ganso solos kenys an eyl dh’y gila hag i ow keschangya tiow. An bobel a wrug aga rann yn kolonnek, ow korthybi yn Kernewek mayth o res – hogen an re nag o kernewegoryon. Ni a worfennas gans korus yntanus a ‘Heyl dh’agan Mammvro’. My a omglewas bos hemma solemptyans gwir a Dhader Duw, ow kevrenna yn fordh pur arbennik yn agan gonisogeth ha honanieth agan honan yn Kernow. (Dyllys yn kensa yn The Coracle mis Ebrel 2013) |
Keworrewgh tamm a Gernewek dh’agas dydh…
Lavarow Kernewek testennel rag gorra y’gas keskows pub dydh… Gonis war-linen rag govyn treylya
|
|